រដ្ឋមន្ដ្រី កើត រិទ្ធ ព្រមានមិនអត់ឱនឲ្យ ចៅក្រម ព្រះរាជអាជ្ញា និងក្រឡាបញ្ជីណា...

Your video will begin in 5

Thanks! Share it with your friends!

You disliked this video. Thanks for the feedback!

Added by admin
76 Views
TOP NEWS: រដ្ឋមន្ដ្រី កើត រិទ្ធ ព្រមានមិនអត់ឱនឲ្យ ចៅក្រម ព្រះរាជអាជ្ញា និងក្រឡាបញ្ជីណា ដែលប្រព្រឹត្តអំពើពុករលួយ ក្នុងយុទ្ធនាការបោសសម្អាតសំណុំរឿង (Video inside)

(ភ្នំពេញ)៖ លោក កើត រិទ្ធ រដ្ឋមន្ដ្រីក្រសួងយុត្តិធម៌ នៅព្រឹកថ្ងៃទី១៨ ខែឧសភា ឆ្នាំ២០២០នេះ បានព្រមានទុកមុនមិនអត់ឱនឲ្យជាដាច់ខាត ចំពោះចៅក្រម ព្រះរាជអាជ្ញា និងក្រឡាបញ្ជីរូបណា ដែលឆ្លៀតឱកាសប្រព្រឹត្តអំពើពុករលួយ ក្នុងពេលយុទ្ធនការដោះស្រាយបញ្ហាកកស្ទះ សំណុំរឿងនៅតាមសាលាដំបូងរាជធានី-ខេត្ត។

ក្នុងសន្និសីទសារព័ត៌មាន ក្រោយប្រកាសដាក់ចេញនូវយុទ្ធនាការ ដោះស្រាយបញ្ហាកកស្ទះសំណុំរឿងនៅតុលាការនេះ រដ្ឋមន្ដ្រី កើត រិទ្ធ ដែលទើបឡើងកាន់តំណែងជារដ្ឋមន្ដ្រីក្រសួងយុត្តិធម៌ បានអះអាងថា សម្រាប់ចៅក្រម ព្រះរាជអាជ្ញា ដែលប្រព្រឹត្តកំហុសវិជ្ជាជីវៈ អាចប្រឈមនឹងការបញ្ចប់ការងារភ្លាមៗតែម្ដង។

លោករដ្ឋមន្ដ្រី កើត រិទ្ធ បានថ្លែងយ៉ាងដូច្នេះថា «យើងមិនអនុញ្ញាតឲ្យមានករណីត្រីងៀតឆ្លៀតពងនោះទេ មានន័យថា មិនអនុញ្ញាតឲ្យយកឱកាស នៃយុទ្ធនាការនេះ ដើម្បីប្រព្រឹត្តអំពើខុសច្បាប់ ឬក៏ជាអំពើមួយដើម្បីផលប្រយោជន៍ផ្ទាល់ខ្លួននោះទេ។ ចឹងអភិក្រមការងារនេះ យើងនឹងប្រកាន់ជំហរម៉ឺងម៉ាត់ ចៅក្រម ព្រះរាជអាជ្ញា ក្រឡាបញ្ជីដែលបានប្រព្រឹត្តខុសនឹងទទួលមកវិញជាមួយនឹងការឆ្លើយតបយ៉ាងម៉ឺងម៉ាត់ ទាំងផ្នែកផ្លូវច្បាប់ ទាំងផ្នែកវិជ្ជាជីវៈ»។

រដ្ឋមន្ដ្រីក្រសួងយុត្តិធម៌រូបនេះ បានសង្កត់ធ្ងន់ទៀតថា ក្រសួងយុត្តិធម៌ ធ្លាប់បានជួយជាមួយអង្គភាពប្រឆាំងអំពើពុករលួយ (ACU) ដែលនេះមានន័យថា ប្រសិនបើមានករណីប្រព្រឹត្តអំពើពុករលួយក្នុងយុទ្ធនាការនេះ គឺក្រសួងយុត្តិធម៌ នឹងចាត់នីតិវិធីឆ្លើយតបដោយម៉ឺងម៉ាត់។

លោកបន្ថែមថា ក្រសួងយុត្តិធម៌ ក៏បានជួបជាមួយសាលាជម្រះក្ដីជាន់ខ្ពស់ដែរ ហើយបន្ដទៀតនេះ នឹងជួបជាមួយឧត្តមក្រុមប្រឹក្សាអង្គចៅក្រម ដើម្បីធានាថា កំហុសផ្នែកវិជ្ជាជីវៈ ក៏ត្រូវឆ្លើយតបជាមួយការទទួលខុសត្រូវផ្នែកវិជ្ជាជីវៈដូចគ្នាផងដែរ ហើយកំហុសវិន័យធំជាងគេផ្នែកវិជ្ជាជីវៈ ដែលអាចរកឃើញ គឺការបណ្ដេញចេញពីក្របខ័ណ្ឌតែម្ដង។

ជាមួយគ្នានេះ លោករដ្ឋមន្ដ្រី កើត រិទ្ធ ក៏អំពាវនាវឲ្យប្រជាពលរដ្ឋ និងអ្នកសារព័ត៌មាន ត្រូវចូលរួមផ្ដល់ព័ត៌មានមកក្រសួងយុត្តិធម៌ ក្នុងករណីឃើញមានភាពមិនប្រក្រតីណាមួយដែលបានកើតឡើង នៅក្នុងយុទ្ធនាការដោះស្រាយបញ្ហាកកស្ទះសំណុំរឿងនៅតុលាការនេះ ដើម្បីផ្ដល់ភាពយុត្តិធម៌ជូនជនរងគ្រោះ។

ពាក់ព័ន្ធនឹងភាពជោគជ័យនៃយុទ្ធនាការនេះ រដ្ឋមន្ដ្រី កើត រិទ្ធ បានអះអាងថា កត្តាដែលជំរុញឲ្យមានភាពជោគជ័យធំ គឺការចូលរួមរបស់ចៅក្រម និងព្រះរាជអាជ្ញា ក្របដោយការទទួលខុសត្រូវ ដូច្នេះមានន័យថា ប្រសិនបើចៅក្រម និងព្រះរាជអាជ្ញា ធ្វើការងារនេះកាន់តែសកម្ម ការដោះស្រាយការកកស្ទះ បានលទ្ធផលកាន់តែច្រើន។ ដោយឡែកសម្រាប់ក្រសួងយុត្តិធម៌ផ្ទាល់ បានកំណត់ទិសដៅរបស់ខ្លួនថា ប្រសិនបើមានការចូលរួមសុឆន្ទៈពីតួអង្គពាក់ព័ន្ធទាំងអស់ ក្នុងរយៈពេលពី ៦ខែ ទៅ៩ខែ នឹងអាចសម្រេចលទ្ធផលប្រហែល៥០ ទៅ៧០ភាគរយ។

ជាមួយគ្នានេះ លោករដ្ឋមន្ដ្រីក្រសួងយុត្ដិធម៌ បានមើលឃើញថា អយ្យការអមសាលាដំបូងរាជធានី-ខេត្ត ពុំសូវបានប្រើប្រាស់វិធីចោទប្រកាន់ចំពោះបទមជ្ឈឹម តាមរយៈការបញ្ជូនទៅជំនុំជម្រះផ្ទាល់ ឬការបង្ហាញខ្លួនភ្លាមនោះទេ ប៉ុន្ដែតែងប្រើវិធីចោទប្រកាន់ចំពោះបទល្មើសប្រភេទនេះ តាមរយៈការបើកស៉ើបសួរ ដែលជាបច្ច័យនាំឲ្យមានការកើនឡើងជាច្រើន នូវសំណុំរឿងនៅក្នុងដំណាក់កាលស៉ើបសួរ។

ដើម្បីអនុវត្តយុទ្ធនាការដោះស្រាយការកកស្ទះសំណុំរឿង នៅតាមសាលាដំបូងរាជធានី-ខេត្ត ជាពិសេសការកាត់បន្ថយការកកស្ទះសំណុំរឿង នៅក្នុងដំណាក់កាលស៉ើបសួរ លោករដ្ឋមន្ដ្រី កើត រិទ្ធ បានណែនាំ និងលើកទឹកចិត្តឲ្យអយ្យការអមសាលាដំបូងរាជធានី-ខេត្តទាំងអស់ យកចិត្តទុកដាក់ ប្រកបដោយស្មារតីទទួលខុសត្រូវខ្ពស់ ក្នុងការផ្ដល់អាទិភាពប្រើវិធីចោទប្រកាន់ចំពោះបទមជ្ឈឹម តាមរយៈបញ្ជូនទៅជំនុំជម្រះផ្ទាល់ ឬការបង្ហាញខ្លួនភ្លាម ដោយផ្អែកតាមអង្គហេតុ នៅក្នុងសំណុំរឿងនីមួយៗ និងផ្អែកតាមលក្ខខណ្ឌ និងនីតិវិធីដែលមានចែងនៅក្នុងក្រមនីតិវិធីព្រហ្មទណ្ឌ។

គួរជម្រាបថា រហូតមកដល់ពេលនេះ សំណុំរឿងដែលកំពុងចាត់ការនៅតាមសាលាដំបូងរាជធានី-ខេត្ត មានចំនួន៣៩,១៥២ សំណុំរឿង (គ្រឿងញៀនមានចំនួន ៦,២៦០សំណុំរឿង) និងមានអ្នកជាប់ឃុំសរុបមានចំនួន ១២,៦៥១នាក់ (អ្នកជាប់ឃុំនៅក្នុងសំណុំរឿងគ្រឿងញៀនមានចំនួន ៦,៩០០នាក់)។

ផ្អែកតាមទិន្នន័យដែលប្រមូលបាន គ្រាន់តែនៅសាលាដំបូងរាជធានីភ្នំពេញ សំណុំរឿងដែលនៅសល់មិនទាន់ចាត់ការរួចពីឆ្នាំ២០១៩ មានរហូតដល់១២,០០០សំណុំរឿង ហើយសំណុំរឿងដែលចូលថ្មី មានជាមធ្យមប្រមាណពី៧០០រឿង ទៅ៩០០រឿង ក្នុងមួយខែដែលបានធ្វើឲ្យ សាលាដំបូងរាជធានីភ្នំពេញ ក្នុងស្ថានភាពបច្ចុប្បន្នមិនអាចឆ្លើយតបដោះស្រាយបញ្ហាប្រឈមនេះបានដោយខ្លួនឯងនោះទេ៕

* ទូរទស្សន៍ព័ត៌មាន Fresh News ផ្សាយគ្របដណ្តប់ទូទាំងប្រទេសតាមរយៈផ្កាយរណប និងខ្សែកាប PPCTV ប៉ុស្តិ៍ 76, DTV ប៉ុស្តិ៍ 19, SkyOne ប៉ុស្តិ៍ 47, One TV ប៉ុស្តិ៍ 18, CCTV ប៉ុស្តិ៍ 37 និងទូរទស្សន៍ខ្សែកាប ២៥រាជធានី-ខេត្ត និងផ្សាយព័ត៌មានថ្មីៗចុងក្រោយតាមប្រព័ន្ធ App, Website, TV Channel, Radio, YouTube, Facebook, English, Chinese, Telegram.
Category
ព័ត៌មានថ្មីៗ
Commenting disabled.